ل زانکۆیا زاخۆ پێشبڕکێیا دروستکرنا پران ب دارکان بڕێڤەچوو

ڕۆژا سێشەمبێ ڕێکەفتی (٢٠٢٦/١١/١٧) ب سەرپەرشتیا ڕێزدار (پ.د. دیار عبدالکریم سعید) سەرۆکێ زانکۆیێ و ب ئامادەبوونا بەرێز ئەندازیار (هێژا محمد) جێگرێ سەرپەرشتێ ئیدارا سەربەخۆ یا زاخۆ و جڤاتا زانکۆیێ و ڕاگرێن کۆلیژان، هەروەسا هژمارەکا کەسایەتیان ژ زانکۆیێن دیتر،قوتابی، مامۆستایێن زانکۆیێ، بەرپرسێن حزبی و حکومی، سەندیکا ئەندازیاران، کەرتێ تایبەت پێشبڕکێیا دروستکرنا پران ب دارکان بڕێڤەچوو.
ئەڤ پێشبڕکێیە ب شێوەیەکێ هەڤپشک د ناڤبەرا حەفت زانکۆ و پەیمانگەهێن هەرێما کوردستانێ دا هاتیە ئەنجامدان؛ ژ وان ژی:
• زانکۆیا زاخۆ.
• زانکۆیا تیشک یا پزیشکی و تەکنۆلۆژی.
• زانکۆیا سەلاحەدین.
• زانکۆیا هەولێرا پۆلیتەکنیک.
• زانکۆیا دهۆکا پۆلیتەکنیک و زانکۆ و پەیمانگەهێن دی.
• زانکۆیا نەوروز.
• زانکۆیا ئاکرێ بو زانستێن كرداری
• هەردۆک پەیمانگەهێن (ڤیا، چارستین).
ئارمانجێن سەرەکی یێن پێشبڕکێیێ
• ​پێشخستنا شیانێن قوتابیان: پتر فێرکرنا قوتابیان بۆ هندێ کو شیانێن خۆ یێن زانستی و پراکتیکی ڕاهێنان پێ بکەن و پێش بێخن.
• ​نەخشەسازی و داهێنان: هاندانا قوتابیان بۆ ئەنجامدانا نەخشەسازیێ (دیزاینێ) و دەستپێکرنا ب مۆدێلێن بچووک.
• ​ئامادەکاری بۆ پڕۆژەیێن مەزن: ئامادەکرنا قوتابیان دا کو د پاشەڕۆژێ دا بگەهنە قۆناغا پڕۆژەیێن ماستەرێ و پڕۆژەیێن ڕاستەقینە یێن ئەندازەیی.
میکانیزما کار و پێڤەرێن زانستی
​د ڤێ پێشبڕکێیێ دا، قوتابی ب ڕێکا بەرهەمئینانا هزرێن داهێنەرانە و دروستکرنا مۆدێلێن پران (جسران) پشکدار دبن. ل سەر بنەمایێ شیکارکرنا ئینشایی (Structural Analysis)، قوتابی بزاڤێ دکەن باشترین و سڤکترین مۆدێل ب دەست خۆڤە بئینن ب بکارئینانا کەرەستێن ئەرزان و یێن بەردەست (وەکو دارێن بچووک یێن دەستکاریکرنێ، سەمغ و هتد).
​ئەڤ مۆدێلە دڤێت ل دیف هندەک میکانیزم و پێڤەرێن زانستی بێتە چێکرن، ژ وان ژی:
• ​سنوردارکرنا کێشا (وەزنا) پرێ.
• ​دیارکرنا جۆرێ دار و کەرەستێن بکارهاتوو.
• ​رێژەیا بکارئینانا سەمغی.
هەژیە بێژین؛ ئەڤ چاڵاکیە لژێر چاڤدێریا بەرێزان ڕاگرێ کۆلیژا ئەندازیاری (پ.هـ.د. فرست حیتو عبدالرحمن) و (د. سیڤەر دلخاز صلاح الدين) و (م. احمد محمد) بوو.

2026/11/17 09:50 PM 44