کۆلیژا پزیشکی ل زانکۆیا زاخۆ کەمپینەکا بەرفرەهـ یا ساخلەمی و هشیاریێ ئەنجام دا
د چارچووڤێ خەمخۆری و ڕۆلێ چالاک و ستراتیژی یێ زانکۆیا زاخۆ د خزمەتکرنا جڤاکی و بهێزکرنا هشیاریا تەندروستیدا، و ب هەماهەنگی دگەل ڕێڤەبەریا ساخلەمیا زاخۆ، کۆلیژا پزیشکی ل ڕۆژا چارشەمبێ، ڕێکەفتی (٢٠٢٦/١١/١١)، کەمپینەکا ساخلەمیا هەمەجۆر ئەنجام دا.
ئەڤ چالاکیا مەزن ب سەرپەرشتیا ڕێزدار (پ.د. دیار عبدالکریم سعید)، سەرۆکێ زانکۆیا زاخۆ، و ب چاڤدێریا ڕێزدار (پ.د. نوفل رشید حسین)، ڕاگرێ کۆلیژا پزیشکی، و ب ئامادەبوونا ڕێزدار (گوهدار شێخۆ)، سەرپەرشتێ ئیدارا سەربەخۆیا زاخۆ، هاتە برێڤەبرن.
کەمپینا ناڤبری دو تەوەرێن سەرەکی و گرنگ بخۆڤە دگرتن:
١. تەوەرێ زانستی و پەروەردەیی (پرۆگرامێ نوژداران):
ئەڤ تەوەرە تایبەت بوو ب چالاکییێن نوژداران؛ تێدا کۆمەکا سمینارێن زانستی هاتنە پێشکێشکرن ب مەرەما نویکرنا زانین، زانست و شیانێن پزیشکی. هەروەسا ئارمانج ژێ بهێزترکرنا پەیوەندیێن پەروەردەیی و زانستی بوو دناڤبەرا نوژداران و قوتابیێن پۆلێن جوداجودا یێن کۆلیژا پزیشکی دا، دا کو بنەمایێن پیشەیی و خزمەتگوزاریا پزیشکی یا سەردەمیانە پتر پێش بکەڤن.
٢. تەوەرێ جەماوەری و هشیاریا تەندروستی:
ئەڤ تەوەره سەر ب دو پشکێن سەرەکی ڤە هاتە دابەشکرن، کو ئەڤ خالە بخۆڤە گرتبوون:
• خیڤەتگەها تەندروستی: ل نێزیکی قشلا یا زاخۆ هاتە دەینان، کو تایبەت بوو ب هشیارکرنا خەلکێ خۆشتڤی یێ دەڤەرێ، بەتایبەت دەربارەی نەخۆشیا شەکرێ. ئەڤ چالاکییە ب هەلکەفتا ڕۆژا جیهانیا نەخۆشیا شەکرێ (یا کو د ١٤ـی تشرینا دویێ دا دهێتە ناسکرن) هاتبوو رێکخستن. د وێ خیڤەتگەهێ دا، تیمێن قوتابیێن پزیشکی پشکدار بوون د ئەنجامدانا پشکنینێن جۆراوجۆر بۆ هاووڵاتیان، بەتایبەت فەحسا ڕێژەیا شەکرێ د خوینێ دا و فەحسا نەخۆشیا دوهنێ (چەورییا خوینێ).
• ماراسۆنا وەرزشی و هشیاریێ: ل ڕۆژا پێنجشەمبێ، ڕێکەفتی (٢٠٢٦/١١/١٢)، چالاکیەکا وەرزشی و هشیاریا گشتی ل ژێر ناڤێ «ماراسۆن» هات ڕێکخستن. مەرەما سەرەکی ژ ئەڤێ چالاکیا وەرزشی، بلندکرنا ئاستێ هشیاریا جڤاکی بوو ل سەر هەمی نەخۆشییان، ب تایبەتی نەخۆشیا شەکرێ، هەروەسا چاندنا وێ ڕامانێ کو وەرزش ببیتە پشکەک گرنگ و بنەرەتی ژ کەلتوورێ ژیانا ساخلەم ل زاخۆ، دەڤەرێ و سەرانسەری کوردستانێ.
ئەڤ کەمپینا بەرفرهە، ڕەنگڤەدانا ڕاستەقینە یا پێگەهـ و ڕۆلێ گرنگ یێ زانکۆیا زاخۆ و کۆلیژا پزیشکییە لە مەیدانا پاراستنا تەندروستیا کۆمەلگەهێ، پتر بەلاڤکرنا هشیاریا ساخلەمیێ، و ئاڤاکرنا پرێن بهێز یێن هەماهەنگیێ دناڤبەرا زانکۆیا مە و دەزگەهێن میری و جڤاکی یێن دەڤەرێ دا.