د چوارچۆڤێ بزاڤ و ئارمانجێن زانکۆیا زاخۆ بۆ پشتەڤانیکرنا شیان و کارامەییێن قوتابیان د بوارێن ئەکادیمی و جڤاکی دا، کۆلیژا ئەندازیاری ب ئاوایەکێ فەرمی چاپتەرێ قوتابیان یێ ڕێکخراوا ناڤدەولەتی یا "ئەندازیارێن بێ سنوور" (Engineers Without Borders - EWB) پەسەند کر و دامەزراندنا وێ ڕاگەهاند.
ڕۆژا دووشەمبی، ڕێکەفتی ١٣ی ئۆکتۆبەرا ٢٠٢٦، ب چاڤدێریا (پ. هـ. د. فرست حیتو عبدالرحمن) ڕاگرێ کۆلیژا ئەندازیاری، و ب سەرپەرشتیا (خانم هلمت سربست خلف) شێوەرمەندا چاپتەرێ EWB، ئاهەنگا دامەزراندنا ڤی چاپتەرێ قوتابیان هاتە سازکرن.
ئەڤ ڕێورەسمە ب ئامادەبوونا ڕێزدار (پ. هـ. د. جاسم محمد عبدو) هاریکارێ سەرۆکێ زانکۆیێ بۆ کاروبارێن زانستی و خواندنا بلند، ڕاگرێن کۆلیژان، سەرۆک پشک، مامۆستا، قوتابی و ئامادەبوونا ژمارەکا مێهڤانێن هێژا برێڤەچوو.
د پشکا دوماهیێ یا ئاهەنگێ دا، ژبۆ نرخاندن و ڕێزلێنان د ڕۆڵێ وان ئێکجار دیار و کاریگەر دا د پێنگاڤێن دروستکرن و گەشەپێدانا ڤی چاپتەرێ ناڤدەولەتی دا، باوەرنامێن سوپاسی و ڕێزلێنانێ پێشکێشی سەرپەرشت و ئەندامێن سەرەکی یێن چاپتەرێ (EWB) هاتنە کرن.