د چارچۆڤێ بەرفرەهکرنا هەڤکاریێن ئەکادیمی و پێشئێخستنا ئاستێ زانستی ل هەرێما کوردستانێ، زانکۆیا زاخۆ ب هەڤکاری و هەڤپشکی دگەل زانکۆیا پۆلیتەکنیکی یا دهۆکێ ئامادەکاریێن خۆ بۆ ئەنجامدانا "شەشەمین کۆنفرانسێ نێڤدەولەتی یێ زانست و ئەندازیاریا پێشکەفتی" (ICOASE2027) دەستپێکرن.
ل سەرۆکاتیا زانکۆیا پۆلیتەکنیکی یا دهۆکێ، ئێکەم کۆمبوونا بەرهەڤی و ئامادەکاریێ بۆ سازکرنا ڤی کۆنفرانسێ گرنگ هاتە ئەنجامدان. لژێر چاڤدێری و سەرپەرشتیا ڕاستەوخۆ یا (پ. د. دیار عبدالکریم سەعید) سەرۆکێ زانکۆیا زاخۆ و (پ. د. ئاری عادل) سەرۆکا زانکۆیا پۆلیتەکنیکی یا دهۆکێ، و ب سەرۆکایەتیا هەڤپشک یا (پ. هـ. د. جاسم محمد عبدو) ژ لایێ زانکۆیا زاخۆ ڤە و (پ. د. یەمان سامی شەریف) ژ لایێ زانکۆیا پۆلیتەکنیکی یا دهۆکێ ڤە.
د ڤێ کۆمبوونێ دا، شاندەکێ ئاست بلند و نوینەرێن زانکۆیا زاخۆ ب شێوەیەکێ چالاکانە پشکدار بوون بۆ دەینانا ئاراستە و مەبەستێن زانستی یێن کۆنفرانسی و دەستنیشانکرنا لژنەیێن کارگێری و زانستی.
ئەڤ کۆنفرانسە دێ ل ڕێکەفتی ٤ تا ٥ێ گولانا ٢٠٢٧ێ ل هەردوو باژێرێن دهۆک و زاخۆ، ب شێوازێ ئامادەبوونا ڕاستەوخۆ (In-person) و سەرهێل/تێکەل (Hybrid) هێتە سازکرن.
ئارمانج و تەوەرێن سەرەکی یێن کۆنفرانسی:
زنجیرە کۆنفرانسێن ICOASE کو ژ سالا ٢٠١٨ێ وەرە ٥ خولێن سەرکەفتی ئەنجامداینە، سەکۆیەکا بلند و زانستی یە بۆ کۆمکرنا ڤەکۆلەر، ئەکادیمی و قوتابیێن خواندنا بلند. کۆنفرانس دێ پێشوازیێ ل ڤەکۆلینێن ڕەسەن و نەبەلاڤکری کەت د ڤان تەوەران دا:
• تەکنەلۆجیایێن زانیاری و کۆمپیوتەری: ژیرییا دەستکرد، ئاساییشا زانیاریان و ئینتەرنێت.
• زانستێن پەتی و کارپێکری: بیرکاری و ئامار، شیکاریا ژمارەیی، کیمیا، فیزیک.
• ئەندازیاریا کارەبا و کۆمپیوتەری: سیستەمێن چەسپاندی، وزەیا نویبوی، پەیوەندیێن بێ تێل، و پرۆسێسکرنا سیگنالان.
• ئەندازیاریا شارستانی: ئەندازیاریا پێکهاتەیی، ژینگەهێ، ئاڤێ، و بیڤەلەرزە.
• ئەندازیاریا میکانیک، پیشەسازی و پەترۆلێ: کۆنترۆلکرنا جۆری، دیزاینا ئامیران، ئەندازیاریا کەرەستان.
• زانستێن سروشتی و ژینگەهی: پیسبوون، مایکرۆبایۆلۆژی، بۆماوەزانی، و زانستێن کەشوهەوای.
ئاستێ زانستی و بەلاڤکرنا ڤەکۆلینان:
هەمی ڤەکۆلینێن پێشکێشکرى دێ کەڤنە بەرهەڵسەنگاندنەکا هویر یا زانستی (Double-blind peer review). ڤەکۆلینێن پەسەندکری دێ د ڤان گۆڤاران دا هێنە بەلاڤکرن:
1. کۆڤارا زانستی یا زانکۆیا زاخۆ (SJUOZ)
2. کۆڤارا داسینیا بۆ ئەندازیاری و ئینفۆرماتیک (DPU)
3. گۆڤار و ژێدەرێن دی یێن ناڤدەولەتی (کو پاشتر دێ هێنە ڕاگەهاندن).
ژڤانێن گرنگ بۆ ڤەکۆلەران:
• دوماهی ژڤان بۆ پێشکێشکرنا ڤەکۆلینان (Full-Text): ١ێ شوباتا ٢٠٢٧
• ڕاگەهاندنا ئەنجامێن پەسەندکرنێ: ١ێ نیسانا ٢٠٢٧
• دوماهی ژڤان بۆ خۆتۆمارکرنێ (Registration): ٢٠ێ نیسانا ٢٠٢٧
پەیوەندی و زانیاریێن زێدەتر:
پێشکێشکرنا ڤەکۆلینان ب ڕێکا سیستەمێ EDAS دێ بیت. بۆ زانیاریێن زێدەتر، پەیوەندیێ ب لیژنەیا ئامادەکار بکەن:
• ئیمەیل: icoase2027@uoz.edu.krd | info@dpu.edu.krd
• تەلەفۆن: 07504503329 | 07504739502 | 07504987542
• جهێ کۆنفرانسی: هۆلا کۆلێژا زانست – زانکۆیا زاخۆ (ناونیشان: 61 ڕێکا زاخۆ، تاخێ مازی، دهۆک).
(تێبینی: هەر ڤەکۆلینەکا پەسەندکری کو ژ لایێ ڤەکۆلەری ڤە د کۆنفرانسی دا نەهێتە پێشکێشکرن، ژ پرۆسەیا بەلاڤکرنێ د گۆڤاران دا دێ هێتە دوورخستن).