زاخۆ، ٥ی تەممووزا ٢٠٢٦
د چارچووڤێ بەرهەفکرنا پەیوەندیێن زانستی و ئەکادیمی دا، ڕۆژا ئێکشەمبێ ڕێکەفتی (٢٠٢٦/٧/٥)، شاندەکێ بلند یێ زانکۆیا زاخۆ ب سەرۆکاتیا ڕێزدار (پ.د. دیار عبدالکریم سعید) ، سەرۆکێ زانکۆیێ، و ڕێزدار (پ.هـ.د. جاسم محمد عبدو) هاریکارێ سەرۆکێ زانکۆیێ بۆ کاروبارێن زانستی ۆ خواندنا بلند، سەرەدانەکا فەرمی و زانستی بۆ زانکۆیا شرنەخ ئەنجامدا. شاندێ مێهڤان ژ لایێ ڕێزدار (پ.د. عبدالرحیم ئالکش) ، سەرۆکێ زانکۆیا شرنەخ، و ژمارەکا سەرکردە و بەرپرسێن ئەکادیمی و دگەل سەروکێ زانکویا باتمان (پ.د.ادریس دەمیر)و سەروکێ زانکویا سێرتێ (پ.د.نیهاد شنداک) و سەروکێ زانکویا هاران (پ.د.محمد تاهرئوغلو) ب گەرمی هاتنە پێشوازیکرن.
ئەڤ سەرەدانە ب مەرەما پەرەپێدان و توندکرنا پەیوەندیێن زانستی و ڕەوشەنبیری دناڤبەرا چار زانکۆیێن وەلاتێ تورکیا(شرناخ،باتمان،هاران،سێرتێ) و چار زانکۆیێن هەرێما کوردستانێ (زاخۆ، سوران، پۆلیتەکنیک دهۆک، ئاکرێ بۆ زانستێن کرداری) دا هاتە ئەنجامدان. د دیدارەکا فەرمی دا، دانوستاندن ل سەر دارشتنا نەخشەڕێیا کارکرنا پێکڤە د پاشەڕۆژێ دا هاتە کرن، ب تایبەتی د بوارێن:
• ئاڵوگۆڕکرنا شارەزاییێن زانستی و ئەکادیمی دناڤبەرا مامۆستا و قوتابییان دا.
• ئەنجامدانا پڕۆژە و ڤەکۆلینێن زانستی یێن هەڤپشک.
• ڕێکخستنا کۆنفرانس و سمینارێن ناڤدەولەتی یێن هەڤپشک.
سەرەدانێن مەیدانی بۆ ناڤەندێن زانستی و کەلتووری
د پشکەکا دی یا بەرنامێ سەرەدانێ دا، شاندێ زانکۆیا زاخۆ خولەکەکا مەیدانی د ناڤ تەلار، سەنتەر و پشکێن جودا جودا یێن زانکۆیا شرنەخێ ئەنجامدا.
هەروەسا، ب مەرەما گرێدانا لایەنێ ئەکادیمی ب ڕەسەناتی و کەلتوورێ دەڤەرێ ڤە، شاندێ مێهڤان سەرەدانا چەندین جهێن مێژوویی و کەلتووری یێن گرنگ کر، کو ل سەرێ وان قوتابخانا دێرینا (مەلایێ جزیری) بوو. د ڤێ سەرەدانێ دا، بەحس ل سەر گرنگیا پاراستن و زیندیکرنا ڤی کەلتوورێ زەنگین و مێژوویی هاتە کرن، وەک پڕەکا فەرهەنگی دناڤبەرا هەردوو دەڤەران دا.
ئەڤ سەرەدانە پێنگاڤەکا گرنگە د ستراتیژیەتا زانکۆیا زاخۆ دا بۆ ڤەکرنا دەرگەهێن هەڤکاریێ دگەل زانکۆیێن هەرێمی و ناڤدەولەتی، بەشداربوونا کارا د گەشەپێدانا بوارێ خواندنا بلند دا.