ب مەرەما پێشڤەبرنا ئاستێ زانستی و ئەکادیمی، کۆلیژا ئەندازیاری ل زانکۆیا زاخۆ، کۆمبوونا خۆ یا دووێ یا تایبەت ب پێداچوون و پەسەندکرنا پڕۆگرامێ خواندنێ یێ پشکا "ئەندازیاریا ژیرییا دەستکرد" بۆ سالا خواندنێ (٢٠٢٦-٢٠٢٧) ئەنجام دا.
ئەڤ کۆمبوونە ب ئامادەبوونا لژنەیەکا زانستی و ئەکادیمی یا پسپۆر کو ژ مامۆستایێن زانکۆیا زاخۆ و زانکۆیا دهۆکێ پێکدهات، هاتە گرێدان. ژ بۆ پێدانا سەنگ و فەرمیەتەکا زانستیتر ب مەنهەجی، پرۆفیسۆر (د. ئەحمەد خورشید) ژ زانکۆیا دهۆکێ وەک سەرۆکێ لژنێ پشکدار بوو، دگەل ئامادەبوونا ڕاگرێ کۆلیژا ئەندازیاری (پ. ھ. د. فرسەت حیتۆ)، و ئەندامێن لژنێ (پ. ھ. د. میوان بهجت، پ. ھ. د. مەسعود محمد، م. شڤان عبدالوهاب، م. عەدنان اسماعیل، د. هەیسەم ثامر، و م. هـ. کوردستان محسن).
د ڤێ کۆمبوونێ دا، گەنگەشەیەکا تێر و تەسەل ل سەر چەندین تەوەرێن گرنگ هاتە کرن و ئەڤ خالێن خوارێ هاتنە پەسەندکرن:
ڕیفۆرمکرنا پڕۆگرامی: پێداچوون و ڕیفۆرمکرنەکا گشتگیر بۆ مەنهەجێ خواندنێ ژ سەمیستەرێ ئێکێ هەتا سەمیستەرێ هەشتێ هاتە ئەنجامدان.
جهگیرکرنا بابەتان: پشتی کو د قۆناغێن دەستپێکی دا کار ل سەر بابەتێن قۆناغێن ئێکێ و دووێ هاتبوو کرن، د ڤێ کۆمبوونێ دا ب شێوەیەکێ کۆتایی بابەت و مەنهەجێ قۆناغێن سێیێ و چوارێ هاتنە داڕشتن و جهگیرکرن.
پەسەندکرنا دوماهیێ: پشتی چەندین ڕۆژێن کارکرنێ ل سەر دۆسیەیا زانستی یا پڕۆگرامی، ب فەرمی ل ڕێکەفتی ٢٨ێ حوزەیرانا ٢٠٢٦ێ مەنهەجێ نووی هاتە پەسەندکرن.
ئەنجامدانا ڤی کاری پێنگاڤەکا گرنگە بۆ گونجاندنا پڕۆگرامێن خواندنێ دگەل پێشکەفتنێن سەردەم و نوویاتیێن جیهانی د بیاڤێ تەکنۆلۆژیا و ژیرییا دەستکرد دا، ب مەرەما ئامادەکرنا دەرچوویەکێ خودان شیان و زانینەکا ب هێز کو بشێت ب باشترین شێوە خزمەتا بازارێ کاری و کۆمەلگەهێ بکەت.