سەنتەرێ پەرەپێدانا کاری (CDC) خۆلەکا پەرستاری و ڕاوێژکاریا دەروونی ب دوماهیک ئینا
ل ژێر چاڤدێرییا سەنتەرێ پەرەپێدانا کاری (CDC) ل زانکۆیا زاخۆ و ب هەماهەنگی لگەل ڕێڤەبەریا گشتیا ساخلەمیا ئیدارەیا سەربەخۆیا زاخۆ، خۆلەکا ڕاهێنانێ یا تایبەت ب بوارێن "پەرستاری و ڕاوێژکاریا دەروونی" بۆ کۆمەکا قوتابیێن زانکۆیێ ب سەرکەفتیانە ب دوماهیک هات.
تەوەر و دەمێ خۆلێ:
ئەڤ خۆلە بۆ دەمێ دوو حەفتیا (ژ ٩ تا ١٩ شواتا ٢٠٢٦) بەردەوام بوو، کو تێدا (٢٥) قوتابیێن زانکۆیێ پشکدار ببوون. ئارمانجا سەرەکی یا ئەڤێ ڕاهێنانێ، بەرهەڤکرنا قوتابیان بوو بۆ سەرەدەریێ دگەل بارودۆخێن نەخوازیار و بلندکرنا ئاستێ وان یێ پراکتیکی.
لایەنێن زانستی و کرداری:
قوتابیان ب شێوەیەکێ زانستی ئاشنا بوون دگەل چەندین تەوەرێن گرنگ، ژ وان:
* هاوارهاتنا دەستپێکی: چەوانیا سەرەدەریێ لگەل کەیسێن تەنگاڤ و کارەساتان.
* کارێن پەرستاری یێن سەرەکی: پیڤانا فشارا خوینێ، دانانا کانیولان، و چارەسەریێن دەستپێکی.
* ساخلەمیا دەروونی: میتۆدێن ئارامکرنا دەروونی و چەوانیا ڕەفتارکرنا دروست لگەل نەخۆشان ژلایێ دەروونی ڤە.
ستافێ ئەکادیمی یێ ڕاهێنەران:
ئەڤ خۆلە ژلایێ پسپۆر و مامۆستایێن شارەزا ڤە هاتە گۆتن، کو پێکهاتبوون ژ:
* د. بێوار شکری (پسپۆڕێ دەروونناسیا گشتی)
* م. جان ولات محمود عبدالحميد
* م. علي فەیزی رەشید
* م. زەکیا عگید توفیق
* م. هوشنگ أكرم خورشيد
داماهیک هاتنا خۆلێ و بەخشینا باوەرنامان:
د ڕێوڕەسمەکێ شایستە دا و ب ئامادەبوونا ڕێڤەبەرێ سەنتەرێ پەرەپێدانا کاری CDC و هاریکارێن سەرۆکێ زانکۆیێ، باوەرنامەیێن پشکداریکردنێ پێشکێشی قوتابیان و ڕاهێنەران هاتنە کرن وەک ڕێزلێنانەک بۆ ماندیبوون و سەرکەفتنا وان د ئەڤێ خۆلێ دا.