ڕۆژا سێشەمبی ڕێـککــەڤتی (٢٠٢٥/٥/١٣) ب ئامادەبوونا وەزیرێ خواندنا بلند و ڤەکۆلینێن زانستی، وەزارەتا خواندنا بلند دیدارا گرنگیپێدان ب پرۆگرامێ پێداگۆجی (ڕێکێن وانەگوتنێ) ڕێکخست و شاندەکێ بلند ژ زانکۆیا زاخۆ، کۆ پێکهاتبوون ژ بەرێزان (پ.هـ.د. جاسم محمد عبدو) هاریکارێ سەرۆکێ زانکۆیێ بۆ کاروبارێن زانستی و خواندنا بلند و (پ.هـ.د. رمضان جعفر مصطفی) هاریکارێ سەرۆکێ زانکۆیێ بۆ کاروبارێن قوتابیان و (پ.د. ستار جبار حاجی) ڕاگرێ کۆلیژا پەروەردە و (م. شلێر مصطفی محمد) ڕێڤەبەرا سەنتەرێ پێداگۆجی و پەرەپێدانا ئەکادیمی و (م. هیڤی ملو عمر) مامۆستا ل کۆلیژا کارگێری و ئابووری و (م. نسرین جلال حسین) مامۆستا ل کۆلیژا زانست، پشکداری د ئەڤێ دیدارێ دا کرن.
هەژیە بێژین؛ ئەڤ دیدارە ب مەرەما گرنگیپێدان و پێشڤەبرن و ڕێکخستنا پرۆگرامێ پێداگۆجی و ڕێکێن وانەگوتنێ ل زانکۆیێن هەرێما کوردستانێ بوو.
د پەیڤەکێ دا، بەرێز (د. ئارام محمد قادر) وەزیرێ خواندنا بلند و ڤەکۆلینێن زانستی ڕاگەهاند: نابیت پرۆسەیا خواندنێ ب تنێ د چارچووڤێ هۆلێن خواندنێ دا بیت، بەلکو دڤێت تێکەلی خەم و پرسێن جڤاکی ببیت) هەروەسا گوت گرنگە ئەم گوهورینێن سەردەم یێن تەکنۆلۆژیایێ ب گرنگ وەربگرین و کاریگەری و گەشەکرنا تەکنۆلۆژیایا ژیریا دەستکرد ل سەر پرۆسا خواندنێ هویرتر بەرێخو بدەینێ و ب هزر و دنیابینیەکا ڤەکری دانوستاندنێ لگەل بکەین.