مێژوویا دانانا زانكۆیا زاخۆ بۆ ساڵا (2005)ێ ڤه‌دگه‌ریت، لبه‌ر ڕۆناهییا ڕاسپارده و گرنگى پێدانا سه‌رۆك (مسعود بارزانی) سه‌رۆكێ هه‌رێمێ كوردستانێ ب ڕه‌وشا خواندنا بلند ل كوردستانێ، هه‌ر د ئه‌ڤى چوارچووڤه‌یدا هێژا (نێچیرڤان بارزانى) سه‌رۆكێ حكوومه‌تا هه‌رێما كوردستانێ (كابینا پێنج)ێ، به‌رێ بنیاتی بۆ هه‌ردوو كۆلیژێن په‌روه‌رده و بازرگانى ل كه‌مپا زانكۆیێ ل زاخۆ دانا و د گوتارا خوه‌دا گۆت: ((ئه‌ڤه بناغێ زانكۆیا زاخۆ یه)). بۆ بجهئینانا ئه‌ڤێ هزرێ ئاماده‌كارى ژلایێ حكوومه‌تا هه‌رێما كوردستانێڤه هاتنه كرن و برێیا زانكۆیا دهۆك بۆ دابینكرنا پرۆژه‌یێن پێدڤى بۆ زانكۆیا زاخۆ هاتنه دابینكرن و هه‌ر ل ساڵا (2005 - 2006) قۆتابى ب ناڤێ زانكۆیا زاخۆ هاتنه وه‌رگرتن و ل( 8/7/2010) سه‌رۆكاتییا حكومه‌تا هه‌رێما كوردستانێ(كابینا شه‌ش)ێ فه‌رمانا دامه‌زراندنا زانكۆیا زاخۆ بفه‌رمى دا. ل سالا خواندنێ (2013ـ2014) پێكهاته‌یا زانكۆیا زاخۆ ب ڤى ڕه‌نگێ خوارێ بوو:
1ـ فه‌كۆلتیا زانست.
2ـ فه‌كۆلتیا زانستێن مرۆڤایه‌تى.
3ـ سكۆلا ئه‌ندازیارى.
بۆ ساڵا (2014ـ2015) وه‌زاره‌تا خواندنا بالا و توێژینه‌وه‌ى زانستى سێ فه‌رمانێن وه‌زارى ده‌ركرینه بۆ ڤه‌كرنا / پشكا ئه‌ندازیارى میكانیك و پشكا په‌روه‌ردا وه‌رزشى و پشكێن په‌روه‌ردا بنه‌ره‌ت/ ئێڤاران یا تایبه‌ت بۆ ماموستایێن وه‌زاره‌تا په‌روه‌ردێ ل چارچوڤێ به‌رنامێ گه‌شه‌كرنێ و په‌ره‌پێدانا مامۆستایێن قۆتابخانێن بنه‌ره‌ت هه‌لگرێن باوه‌رنامێن دبلوم و ئاماده‌یى و ب هه‌ماهه‌نگى دناڤبه‌را هه‌ردوو وه‌زاره‌تێن خواندنا بلند و تۆێژینه‌وه‌ى زانستى و وه‌زاره‌تا په‌روه‌ردێ، پێكهاتێ زانكۆیا زاخۆ بۆ سالا خواندنێ (2017ـ2018) ژ ئه‌ڤان كۆلیژ و فه‌كۆلتیان پێكدهێت:
1. فه‌كۆلتیا زانست ژ شه‌ش پشكێن زانستى پێكدهێت.
2. فه‌كۆلتیا زانستێن مرۆڤایه‌تى ژ شه‌ش پشكێن زانستى پێكدهێت.
3. كۆلیژا كارگێرى و ئابۆرى ژ سێ پشكێن زانستى پێكدهێت.
4. كۆلیژا ئه‌ندازیارى ژ دوو پشكێن زانستى پێكدهێت.
5. فه‌كۆلتیا په‌روه‌رده ژ چوار پشكێن زانستى پێكدهێت.
6. كۆلیژا په‌روه‌ردا بنیات ژ پێنج پشكێن زانستى پێكدهێت.
7. كۆلیژا پژیشكى ژ دوو پشكێن زانستى پێكدهێت.
زانكۆیا زاخۆ گرنگیێ دده‌ته گه‌شه‌كرن و دابینكرنا گشت پێدڤیێن زانستى بۆ هه‌ر پشكه‌كا زانستى و په‌یره‌وكرنا دلنیایى جورى و ل به‌رچاڤ وه‌رگرتنا هه‌بوونا ده‌لیڤه و بازارێ كارى بۆ ده‌رچوویێن زانكۆیێ و به‌رنامه‌یه‌كێ دارێژتى هه‌یه بۆ بلندكرنا ئاستێ زانستێ ل دویڤ پیڤه‌رێن جیهانى ب ڕێكا به‌رنامێ په‌رپێدان و گه‌شه‌كرنا پروگرامێن خواندنێ و جێبه‌جیكرنا ڕینمایێن ته‌ندروستى و سلامه‌تى و زانستخوازیا به‌ردوه‌ام و دلنیایى جورى، كو ئه‌ڤه ژى به‌شه‌كه ژ سیاسه‌تا حكومه‌تا هه‌رێما كوردستانى و باشترین نموونه ژى بۆ ئه‌ڤێ چه‌ندێ به‌رده‌وامبوونا پرۆگرامێ تواناسازى ب هنارتنا سه‌دان ژ ده‌رچوو و مامۆستایێن زانكۆیى بۆ زانكۆیان ل وه‌لاتێن پێشكه‌ڤتى بۆ ب ده‌ستڤه‌ئینانا باوه‌رنامه‌یێن ماسته‌ر و دكتورایێ ب زانستێن جورا و جور، دا كو ل ئاینده‌ى هه‌ر ئێك ل دویڤ پسپوریا خۆ ببنه شه‌نگستَََێ گهۆرین و پیشكه‌فتێ ل هه‌رێما كوردستانى و ژماره‌كا وان خواندنا خۆ ته‌مامكرینه و ڤه‌گه‌ریانه كوردستانێ . ژ لایه‌كى دیڤه و ل ساڵا خواندنى ( 2013- 2014 ) هه‌ڤده قۆتابیان باوه‌رناما دكتۆرایێ ژ زانكۆیا زاخۆ وه‌رگرتییه و حه‌فتێ قۆتابیان ژى باوه‌رنامه‌یا ماسته‌رێ وه‌رگرتیه و نێزیكى پێنجى قۆتابى د به‌رده‌وامن لسه‌ر خواندنا ماسته‌ر و دكتۆرایێ ل زانكۆیێن هه‌رێمێ و ئیراقێ و ده‌رڤه‌یى وه‌لاتێ.