دووەمین پێشانگەها کاری ژ لایێ سەنتەرێ گەشەپێدان بۆ کاری یێ زانکۆیا زاخۆ، و ب هەماهەنگیا دەزگەهێ رەوانگە و ڕێکخراوا (NRC) هاتبوو ڕێکخستن. 

پەنەڵێ بەرپرسایەتیا (گەنج، زانکۆ، کەرتێ تایبەت) ژبۆ دامەزراندنێ د هەمان روژدا هاتە پێشکێشکرن،  ب پشکدارییا بەرێزان (د.احمد صار ئەندامێ بەری نها یایێ پەرلەمانێ عێراقێ، عبدلسلام مدنی ڕێڤەبەرێ گشتی یێ دەزگەهێ رەوانگە، د. شڤان احمد جێگرێ سەرۆکێ زانکۆیا نەورۆز، مازن سیروان رێڤەبەرێ پەیوەندی و دیجیتال ل کۆمپانیا کۆرەك تلیکۆم) هاتە پێشکێشکرن، تێدا چەندین بابەت هاتنە باسکرن.

دکتور احمد صفار شارەزا د ئابوورێدا باس ل بێکاریێ و کاریگەریێن وێ لسەر تاکی و کومەلگەهێ کر و هەروەسا چاوانیا پێشڤەبرنا پڕۆژێن بچویک و چارەسەرکرنا ئاریشێن دکەڤنە د ڕێکا کارکرنا تاکیدا.

عەبدولسەلام مەدەنی شارەزا د بوارێ گەشەپێدان و گەنجاندا، باس ل ڕۆلێ تاکی کر چاوانیا خۆ گونجاندن دگەل ڕۆیدانێن دهێنە پێش، هەروەسا باس ل پێکولێن گەنجان یێن تاکەکەسی کر، گوت پێدڤییە گەنج کار لسەر خۆ بکەت و خۆ فێر بکەت کا چاوا دێ شێت کارەکێ بدەستڤە بینیت.

دکتور شڤان ئەحمەد ماموستایێ زانکۆیێ، د گوتنا خودا؛ دا دیارکرن کۆ دڤێت قوتابیێ دەرچوو بزانیت کا چ بوار خواندییە و وی چ دڤێت ژ جهێ دچیتێ، هەروەسا گوت ڕاستە سیستەمێ خواندنێ نە گەلەکێ هاریکارە بۆ ئەڤێ چەندێ لێ دڤێت ئەم بەردەوام پشتگیرییا قوتابیان بکەین، بۆ هندێ بزانن دێ چ کەن و بەرێ خۆ دەنە کیڤە.

مازن سیروان وەکۆ شارەزایی د کەرتێ تایبەتدا هەی، باس ل ئەوان ڕێک و ڕێکاران کر ئەوێن کەرتێ تایبەت بکاردئینیت بۆ وەرگرتنا فەرمانبەرەکێ شارەزا د کاریدا.