ڕۆژا چارشەمبی ڕێــککـــەفتی (٢٠٢٥/٢/١٩) شاندێ زانکۆیا زاخۆ ب سەرۆکاتیا ڕێزدار (پ.د. ناظم سليمان عبدالعزيز) سەرۆکێ زانکۆیێ و دگەلدا بەرێزان (پ.هـ.د. ژیروان سعید حاجی) سەرۆکا پشکا زمانێ کوردی و (پ.هـ.د. سانیا عبدالجبار) مامۆستا و پسپۆرا زمانێ کوردی، پشکداری د دیدارا "ژیوارى زمانى کوردى لە ئێستاو داهاتوودا" کرن.

ب هەلکەفتا ڕۆژا زمانێ دایکێ، وەزارەتا خواندنا بلند و ڤەکۆلینێن زانستی ب هەڤپشکیا ئەکادیمیا کوردی، ب ئامادەبوونا نوینەرێ وەزارەتا خواندنا بلند و سەرۆکێ ئەکادیمیا کوردی مامۆستا (حەمە سەعید حەسەن) دیدارا (ژیوارێ زمانێ کوردی د نوکە و پاشەڕۆژێ دا" سازکر. د دیدارێ دا سەرەڕای پیرۆزباهیان ب هەلکەفتا ڕۆژا زمانێ دایکێ، ب شێوەیەکێ کارەکی و ب ڕێکا چار پڕۆژەیێن زانستی ب هەڤپشکی و پشکداریا ڕاستەوخۆیا پسپۆرێن زمانێ کوردی ل پشکێن کوردیێ ل زانکۆیێن هەرێما کوردستانێ دانوستاندن لسەر بابەتان هاتە کرن، پاشان چەند پەیڤ هاتنە خواندن و چەندین بابەتێن زانستى و ئەکادیمى ژلایێ مامۆستایێن زانکۆ و ئەکادیمیسیانان ڤە هاتنە پێشکێش کرن و دوپاتی ل سەر پاراستنا ڕەسەنایەتیا زمانێ دایکێ بۆ هەر میللەت و نەتەوەیەکێ وەک شوناسێ راستەقینەیا گەلان هاتە کرن.