ل ڕۆژا پێنجشه‌مبێ ڕێكه‌ڤتى (25-2-2021) ل كولیژا زانستێن ته‌ندورستى ل گرێ باسێ ب ئاماده‌بونا به‌رێزان دكتۆر(على ته‌ته‌ر) پارێزگارێ دهۆكێ و دكتۆر (لزگین عبدى جمیل) سه‌روكێ زانكویا زاخو وجێگرێ وه‌زیرێ خاندنا بلند وهاریكارێ سه‌روكێ زانكویا دهۆكێ  كلینیكا ئاى پى پى یا ئه‌لمانى بو چاره‌سه‌ریا ده‌رونى هاته‌ ڤه‌كرن.

پارێزگارێ دهۆكێ دپه‌یڤه‌كێدا بناڤێ حكومه‌تا هه‌رێما كوردستانێ وكارگێریا پارێزگه‌هێ سوپاسیا حكومه‌تا ئه‌لمانیا وحكومه‌تا هه‌رێما (بادن ڤوتنبێرگ) وزانكویا توبینگن یا ئه‌لمانى كر كو پشته‌ڤانیا ڤه‌كرنا كلینكێ كریه‌ هه‌روه‌سا سوپاسیا زانكویا دهۆك كر بۆ هاریكاریا وان وڤه‌كرنا كلینكى دناڤ ئاڤاهیێ كولیژا زانستێن ته‌ندورستى دا.

پارێزگارێ دهۆكێ ته‌كه‌ز كر كو پشتى هێرشێن تیرورستێن داعش بو سه‌رده‌ڤه‌رێن كورستانێ وگرتن وره‌ڤاندنا كچ وژنێن ئێزدى  نه‌خوشیێن ده‌رونى ل جه‌م گه‌له‌ك ئاوارا چێبوینه‌ وسوپاسیا حكومه‌تا ئه‌لمانیا ورێكخراوێن خێرخازى كر كوچاره‌سه‌ریا گه‌له‌ك ژوان توشبوویا هاتیه‌ كرن وب ڤه‌كرنا ڤێ كلینیكێ دێ چاره‌سه‌ریا گه‌له‌ك توشوبویێن دن ل پارێزگه‌هێ هێته‌ كرن وخواست كو حكومه‌تا ئه‌لمانیا پتر ڤان جوره‌ هاریكاریا پێشكێشبكه‌ت وپشته‌ڤانیا پارێزگه‌هێ نیشاندا بو هه‌ر هه‌ڤكاریه‌كێ.

هه‌ر د رێورسمێن ڤه‌كرنا كلینیكێدا چه‌ندین په‌یڤێن دن  هاتنه‌ خاندن وگرنگیا كلینیكا ناڤبرى به‌رچاڤكرن.

هه‌ژى گوتنێ یه‌ كلینیكا ئاى پى پى یا ئه‌لمانى بو چاره‌سه‌ریا ده‌رونى ب پشته‌ڤانیا حكومه‌تا ئه‌لمانیا و په‌یمانگه‌ها چاره‌سه‌ریا ده‌رونى وزانكویا دهۆكێ وته‌ندورستیا دهۆكێ هاتیه‌ ڤه‌كرن ونوكه‌ دوو نوشدار وهه‌شت كارمه‌ند ژ ده‌رچویێن په‌یمانگه‌ها ناڤبرى خزمه‌تێن چاره‌سه‌ریا ده‌رونى پێشكێشى هه‌ر هاولاتییه‌كى دكه‌ن وبێ به‌رامبه‌ر وكلینیك ژده‌م ژمێر (10سپێدێ هه‌تا 6ئیڤارى) خزمه‌تا هه‌مى نه‌خوشان دكه‌ت.