جڤاتا زانكۆیا زاخۆ ئێكه‌مین كۆمبوونا ئونلاین ئه‌نجامدا

Sunday, 22 March 2020

ل ڕۆژا  ئێكشه‌مبێ ڕێكه‌ڤتى (22/3/2020) لده‌مژمێر (11:00) سپێدێ، ب سه‌رۆكایه‌تییا ڕێزدار پرۆفیسۆر دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و ب ئاماده‌بوونا هاریكارێن سه‌رۆكێ زانكۆیێ و ئه‌ندامێن جڤاتێ، ئێكه‌مین كۆمبوونا جڤاتا زانكۆیێ ب شێوازێ (ئونلاین) برێیا (Google application - Hangouts meet) ده‌رباره‌یى ڕه‌وشا هه‌رێما كوردستانێ و پاشه‌رۆژا خواندنێ ب تایبه‌ت چاره‌نڤێسێ خواندنا قوتابییێن زانكۆیا زاخۆ ب به‌رفره‌هى هاته‌ ئه‌نجامدان. 

لده‌ستپێكێ ڕێزدار سه‌رۆكێ زانكۆیا زاخۆ ب تێر و ته‌سه‌لى باسێ ڕه‌وشا جیهانێ و كوردستانێ ب تایبه‌تى و مژارا ڤایرۆسێ كورۆنا (COVID-19)  كر، پاشان ده‌ستخۆشیێن تایبه‌ت ئاراسته‌یى حكومه‌تا هه‌رێما كوردستانێ و لیژنه‌یا بلند یا به‌رهه‌نگاربوونا ڤایرۆسێ كورۆنا و پاراستنا هه‌ڤوه‌لاتییان كر. لدویڤدا ب ئاوایه‌كێ تایبه‌ت ده‌رباره‌یى پرۆسێسا خواندنێ و به‌رهه‌ڤییێن زانكۆیا زاخۆ بۆ هه‌ر پێشهاته‌كێ و جێبجێكرنا سیسته‌مێ ئه‌لیكترۆنی (ئونلاین) بۆ خواندنا قوتابییان (سپپێده‌ و ئێڤاران) په‌یڤى. 

ژلایێ خۆ ڤه‌ ئه‌ندامێن جڤاتا زانكۆیێ ب تایبه‌تى ڕێزدار پرۆفیسۆر دكتۆر (یاسین تاها مسته‌فا) و ڕێزدار پرۆفیسۆرێ هاریكار دكتۆر (كاروان فه‌همى سامى) باس ل به‌رهه‌ڤى و ئاماده‌كاریێن زانكۆیا زاخۆ بۆ جێبجێكرنا پرۆسێسا خواندنا ئه‌لیكترۆنى (ئونلاین) كرن. هه‌ر دوو به‌رێزان ئاماژه‌ ب ئه‌وێ چه‌ندێ دان، كو زانكۆیا زاخۆ ژێرخانه‌یه‌كا ئه‌لیكترۆنى یا هه‌ره‌باش هه‌یه‌، ژبه‌ركو زانكۆیێ  بۆ ماوه‌یێ پتر ژ سێ سالانه‌ كار و ئاماده‌كارى ژبۆ پێشهات و ڕویدانێن ژ ئه‌ڤى ڕه‌نگى كربوون. له‌ورا ته‌ڤایا كارێن گرنگ وه‌ك (دروستكرنا ئیمێلێن تایبه‌ت ژبۆ قوتابییان، كونتاكتا ئه‌وان ئیمێلان ب سیسته‌مێن زانكۆیێ، ڕاهێنان و فێركرنا قوتابییان و چاوانییا بكارهینانێ، پۆرتالێ قوتابییان، سیسته‌مێ په‌رتووكخانه‌یێ ب شێوازێ ئونلاین ...هتدد) ب ڕێكوپێكى ب شێوازێ ئونلاین به‌رهه‌ڤكرینه‌. 

ژلایێ خۆڤه‌ ڕێزدار پرۆفیسۆرێ هاریكار دكتۆر (كاروان فه‌همى سامى) هاریكارێ سه‌رۆكێ زانكۆیێ بۆ كاروبارێن قوتابییان داخویانییه‌ك تایبه‌ت ژبۆ مالپه‌رێ زانكۆیێدا و گۆت: ئه‌ڤرۆ مه‌ وه‌ك جڤاتا زانكۆیێ ئێكه‌مین كۆمبوونا خۆ یا ب شێوازێ ئه‌لیكترۆنى (ئونلاین) ئه‌نجامدا، د كۆمبوونێدا مه‌ ب هویربینى باسێ هه‌ر تشتێ پێدڤى و ژێرخانه‌یا ئه‌لیكترۆنییا زانكۆیا زاخۆ و جێبجێكرنا پرۆسێسا خواندنا ئونلاین كر. ئه‌م مزگینى و دلخۆشییێ ب قوتابییێن خۆ یێن خواندنا (سپێده‌ و ئێڤاران) دده‌ن، كو دێ ب هه‌مى ڕه‌نگا هاریكار و پشته‌ڤانێن وان بین كو خواندنا وان یا ئه‌ڤ ساله‌ ب هه‌روه‌یى نه‌چیت. 

هه‌روه‌سا هاریكارێ سه‌رۆكێ زانكۆیێ گۆت: ژبه‌ركو مه‌ ژێرخانه‌یه‌كا ئه‌لیكترۆنى یا هه‌ره‌باش هه‌یه‌ و نێزیكى (10,000) ئیمێلێن تایبه‌ت ژبۆ قوتابییان هاتینه‌ دروستكرن، هه‌روه‌سا پرانییا ماموستایێن زانكۆیێ ب باشى دزانن سیسته‌مێ مودل (Moodle) بكاربهینن، زێده‌بارى ئه‌ڤێ چه‌ندێ لیژنه‌یه‌كا تایبه‌ت یا سه‌رپه‌رشتى و دویڤچوونێ ژلایێ سه‌نته‌رێ ته‌كنۆلۆژییا زانیارى و ئامارێ هاتییه‌ دروستكرن، له‌ورا ئه‌م ب باوه‌ر و به‌خته‌وه‌رن كو دێ ئه‌ڤێ قوناغێ ب سه‌ركه‌ڤتیانه‌ تێپه‌رینن. 

د ڕۆژگارا ئه‌ڤرۆ دا جیهان د دۆخه‌ك ناله‌بار و نه‌خۆشدا ده‌ربازدبیت، ژبه‌ركو ڤایرۆسێ كورۆنا (COVID-19) بوویه‌ هه‌ره‌شه‌یه‌كا مه‌زن بۆ سه‌ر جیهان و مرۆڤایه‌تییێ، له‌ورا پرانییا وه‌لاتێن جیهانێ پرۆسێسا خواندنێ بۆ ده‌مه‌ك نه‌دیار ڕاوه‌ستاندینه‌. ب مه‌به‌ستا ئه‌ڤێ چه‌ندێ كو سالا خواندنێ (2019-2020) یا قوتابییێن زانكۆیا زاخۆ ب هه‌روه‌ نه‌چیت، جڤاتا زانكۆیێ بریاردایه‌ هه‌موو شیانێن خۆ بكاربهینت و سالا خواندنێ ب شێوازێ ئونلاین ب سه‌ركه‌ڤتیانه‌ ده‌ربازبكه‌ت.